Revit და SketchUp ერთ-ერთი ყველაზე პოპულარული საპროექტო პროგრამებია, თუმცა მათი დანიშნულება განსხვავებულია. Revit ძირითადად გამოიყენება BIM მოდელის შესაქმნელად, ტექნიკური ინფორმაციის სამართავად და დოკუმენტაციის მოსამზადებლად, ხოლო SketchUp მოსახერხებელია მაშინ, როდესაც საჭიროა იდეების სწრაფად ტესტირება, ფორმებისა და სივრცეების ანალიზი ან უფრო მკაფიო ვიზუალური პრეზენტაციის მომზადება.
სწორედ ამიტომ, ამ პროგრამებს შორის მოდელების გადატანა მრავალი გუნდისთვის აქტუალური საკითხია. ერთ შემთხვევაში, Revit-ის მოდელის გამოყენება სურთ SketchUp-ის გარემოში, რათა უფრო სწრაფად ჩატარდეს ვიზუალური ანალიზი ან შეიქმნას კონცეპტუალური გადაწყვეტები. მეორე შემთხვევაში კი SketchUp-ის მოდელის ინტეგრირება ხდება Revit-ის პროექტში, როგორც კონტექსტი, საწყისი იდეა ან შემდგომი მუშაობის საფუძველი.
Revit-ის მოდელის გამოყენება SketchUp-ის პროექტში
SketchUp-ის ერთ-ერთი მნიშვნელოვანი განახლებაა Revit Importer ფუნქციონალი, რომელიც Revit-ის მოდელების SketchUp-ის გარემოში უფრო მარტივად გადატანას ემსახურება. ადრე ამისთვის გამოიყენებოდა შუალედური ფორმატები, მაგალითად IFC ან DWG, თუმცა ასეთი მეთოდი ყოველთვის მოსახერხებელი არ იყო. ამ გზით მოდელის გადატანისას ხშირად იკარგებოდა სტრუქტურის, მასალების, ფენების ან იერარქიის ნაწილი, რის გამოც იმპორტის შემდეგ მოდელის დამატებითი დამუშავება ხდებოდა საჭირო.
Revit Importer, რომელიც ხელმისაწვდომია SketchUp Studio-ს გამომწერებისთვის, ამ პროცესს მნიშვნელოვნად ამარტივებს. SketchUp-ს შეუძლია პირდაპირ .rvt ფაილების იმპორტი და არა მხოლოდ გეომეტრიის, არამედ მოდელის სტრუქტურის მნიშვნელოვანი ნაწილის გადატანაც, რაც შემდგომ მუშაობას SketchUp-ის გარემოში უფრო კომფორტულს ხდის.
Revit-ის მოდელის იმპორტის დროს:
- Revit-ის ფემილები კონვერტირდება SketchUp-ის კომპონენტებად;
- Revit-ის კატეგორიები გადადის SketchUp-ის Tags-ში;
- Revit-ის Levels გარდაიქმნება SketchUp-ის Sections-ად;
- ამასთან ერთად, შენარჩუნებულია მასალებისა და მოდელის ორგანიზების ლოგიკის ნაწილიც.
ეს SketchUp-ის გარემოში არა მხოლოდ Revit-ის მოდელის გეომეტრიის ნახვის, არამედ მასში უფრო მარტივად ორიენტირების შესაძლებლობასაც იძლევა. მოდელის გამოყენება შესაძლებელია ვიზუალური ანალიზისთვის, კონცეპტუალური გადაწყვეტების შესაქმნელად, ალტერნატივების მოსაძებნად ან პროექტის პრეზენტაციისთვის — ყველაფრის ნულიდან გადაკეთების გარეშე.
მნიშვნელოვანია გავითვალისწინოთ, რომ ასეთი იმპორტი არ ნიშნავს Revit-ის მოდელის სრულფასოვან რედაქტირებას SketchUp-ის გარემოში. ამ შემთხვევაში SketchUp უფრო სამუშაო სივრცედ გვევლინება, სადაც Revit-ის მოდელი გამოიყენება როგორც საფუძველი შემდგომი ანალიზისთვის, ესკიზირებისათვის ან ვიზუალური გადაწყვეტების შესამოწმებლად.
დამატებით, მოდელების იმპორტი შესაძლებელია პირდაპირ Trimble Connect-იდანაც, რაც გუნდებს საშუალებას აძლევს იმუშაონ საერთო მონაცემთა გარემოში (CDE) შენახულ ფაილებთან დამატებითი ლოკალური ასლების შექმნის გარეშე. ეს განსაკუთრებით მოსახერხებელია მაშინ, როდესაც ერთსა და იმავე მოდელზე რამდენიმე პროექტის მონაწილე მუშაობს და მნიშვნელოვანია ფაილის აქტუალური ვერსიის გამოყენება.
SketchUp მოდელის გამოყენება Revit პროექტში
საპირისპირო მიმართულებით გადაადგილებისას – SketchUp-დან Revit-ში – სამუშაო პროცესი არც ისე პირდაპირია. ამის მიზეზია ის, რომ Revit წარმოადგენს BIM სისტემას, სადაც ელემენტებს მხოლოდ გეომეტრია არ გააჩნიათ, არამედ ასევე კატეგორიები, პარამეტრები და კავშირები მთელი პროექტის სტრუქტურასთან.
ამ მიზეზით არ არსებობს ერთი უნივერსალური გადაწყვეტა, რომელიც SketchUp ობიექტებს ავტომატურად გადააქცევს სრულფასოვან Revit ელემენტებად. მიუხედავად ამისა, SketchUp მოდელები მაინც შეიძლება იყოს ძალიან სასარგებლო Revit პროექტში, განსაკუთრებით მაშინ, როდესაც ისინი გამოიყენება როგორც კონცეფციის საფუძველი, გარემოს კონტექსტი ან საწყისი ეტაპის გადაწყვეტა.
ერთ-ერთი მეთოდია SketchUp ფაილის ჩასმა Revit პროექტში. Revit საშუალებას იძლევა .skp ფაილი გამოყენებულ იქნას როგორც „In-Place Component“ და მიენიჭოს კონკრეტული კატეგორია. ასეთ შემთხვევაში SketchUp მოდელი ხდება პროექტის ნაწილი და შეიძლება გამოყენებულ იქნას როგორც კონტექსტური ან ვიზუალური ელემენტი.
კიდევ ერთი ვარიანტია „Link CAD“ ფუნქცია. ის საშუალებას იძლევა SketchUp მოდელი ჩაიტვირთოს როგორც დაკავშირებული ობიექტი. ასეთი მოდელი არ არის Revit ფემილის ნაწილი, თუმცა სასარგებლოა მაშინ, როცა საჭიროა სივრცითი კონტექსტის ნახვა, მასშტაბის შემოწმება ან SketchUp მოდელის გამოყენება როგორც მითითება შემდგომი სამუშაოსთვის.
თუ მნიშვნელოვანია უფრო სტრუქტურირებული ინფორმაციის გადაცემა, შესაძლებელია SketchUp-დან IFC ექსპორტის გამოყენება და მისი იმპორტი Revit-ში. IFC ფორმატი უფრო ახლოსაა BIM მონაცემების სტრუქტურასთან, ამიტომ სწორად მომზადებული და კლასიფიცირებული SketchUp მოდელი უკეთ ინტერპრეტირდება Revit გარემოში. ეს გზა უფრო ეფექტურია მაშინ, როცა მოდელი მხოლოდ ვიზუალური საფუძველი კი არა, არამედ ინფორმაციის გადაცემის ნაწილიც უნდა იყოს.
მეთოდის არჩევისას მნიშვნელოვანია წინასწარ განისაზღვროს, რა მიზანს ემსახურება SketchUp მოდელი Revit პროექტში. თუ საჭიროა მხოლოდ კონტექსტი ან კონცეპტუალური ვიზუალი, საკმარისია ჩასმული ან დაკავშირებული .skp ფაილი. ხოლო თუ მოდელს უნდა ჰქონდეს უფრო მკაფიო სტრუქტურა და გამოიყენებოდეს უფრო ფართო BIM პროცესში, სასურველია IFC ექსპორტისთვის მომზადება და მოდელის კლასიფიკაციაზე მეტი ყურადღების დათმობა.
როდის რომელი მეთოდი უნდა გამოვიყენოთ?
Revit მოდელის SketchUp-ში იმპორტი ყველაზე ხშირად გამოიყენება მაშინ, როცა საჭიროა უკვე არსებული BIM მოდელის სწრაფად გამოყენება ვიზუალური ანალიზისთვის, კონცეფციების შექმნისთვის ან გადაწყვეტილებების პრეზენტაციისთვის. ასეთ შემთხვევაში მნიშვნელოვანია, რომ მოდელის სტრუქტურა საკმარისად ორგანიზებული იყოს, რათა SketchUp გარემოში მარტივად იმუშაონ კომპონენტებთან, ნიშნებთან, ფენებთან და მასალებთან.
SketchUp მოდელის Revit პროექტში გამოყენება უფრო ხშირად გვხვდება პროექტირების ადრეულ ეტაპებზე, ურბანისტული კონტექსტის შექმნისას, გარემოს მოდელირებისას ან ალტერნატიული გადაწყვეტების წარმოდგენისას. აქ განსაკუთრებით მნიშვნელოვანია მკაფიოდ გაიმიჯნოს, გამოიყენება თუ არა მოდელი მხოლოდ ვიზუალურ საფუძვლად, თუ მისგან უფრო ფართო BIM ინფორმაციის მიღებაც არის მოსალოდნელი.
რაც უფრო ზუსტად არის განსაზღვრული მოდელის დანიშნულება, მით ნაკლები დამატებითი სამუშაო ხდება შემდგომ ეტაპებზე. ეს განსაკუთრებით მნიშვნელოვანია გუნდურ მუშაობაში, სადაც სხვადასხვა სპეციალისტი სხვადასხვა პროგრამას იყენებს, მაგრამ საერთო პროექტის მონაცემებზე დაყრდნობით მუშაობს.
სტატიის წყარო: www.infoera.lt